23F: Rosalía de Castro

Benqueridas lectoras da nosa bitácora! Hoxe celébrase o Día de Rosalía de Castro, por ser o día do seu aniversario. 

Imaxe da web de Cumio Editora.

Rosalía de Castro naceu o 23 de febreiro de 1837 en Conxo (Santiago de Compostela) e é unha das autoras galegas máis coñecidas ao longo do mundo. Si, ao longo do  mundo, sen esaxerar. Non esaxeramos porque Rosalía sexa galega e a súa obra nos guste moito ou porque lle dese valor a nosa lingua e cultura, senón que de certo a súa obra e figura é recoñecida máis alá do que imaxinamos. Porque... sabiades que Rosalía de Castro aparece nos cómics de Batman? E que ten un mural en Nova York da man da artista viguesa Vanesa Álvarez? E que a súa imaxe voa nun avión da compañía Norwegian Air? Pero non só iso, senón que o nome de Rosalía resoa a millóns de quilómetros do noso propio planeta, xa que a escritora conta cunha estrela co seu nome. Si, si, como oídes. Aí fóra no ceo estrelado hai unha estrela que se chama Rosalía de Castro en honra a nosa gran poeta. E aínda que desde aquí se vexa ben pequeniña e tímida pola distancia, a estrela de Rosalía é un pouco máis grande que a nosa estrela o Sol. Como recitaba Rosalía en Cantares Gallegos «Cada estrela, o seu diamante» e ela xa ten o seu propio no firmamento.

Rosalía foi  unha novelista e unha gran pioneira da poesía española moderna e do pensamento feminista, pero ademais foi unha peza clave do Rexurdimento. E que é isto do Rexurdimento? Trátase dun movemento que estudaredes no instituto, pero dito así de forma moi rápida e resumida, consistiu en pór en valor a lingua e cultura galega nunha época en que estaba moi deostada. Escribir usando a lingua galega non tiña ningún sentido. E pese a que Rosalía empregaba tamén a lingua castelán nas súas publicacións, o uso da lingua galega en libros como Cantares Gallegos foi  todo un acto revolucionario e por iso, o día das Letras Galegas se celebra o 17 de maio, coincidindo co día en que se publicou Cantares Gallegos (que por certo, se fixo en Vigo).

Estudar a  Rosalía de Castro non é unha tarefa do todo doada, xa que existen moitas lagoas e datos contraditorios en torno a súa vida. Pero outros datos pertencentes a súa traxectoria vital e publicacións están máis que refutados. Poderiámonos estender por aquí con eles, pero pensamos que este magnífico Genially elaborado por distintos centros da provincia de Coruña e Ourense coa colaboración de Davila, resulta moito máis entretido para achegarse á autora.

Para aquelas persoas que quedástedes con ganas de seguir pondo a proba o voso coñecemento, deixámosvos un rosco elaborado colaborativamente tamén por centros da provincia da Coruña, provincia onde Rosalía pasou parte da súa vida.

E para as que queirades afondar máis na vida e obra de Rosalía de Castro, deixámosvos por aquí un vídeo moi didácticto de @neeumatiko.

A Asociación Galega da Guía do Libro Infantil e Xuvenil tamén elaborou unha guía sobre Rosalía para afondarnos na súa vida e obra. Algunhas destas recomendacións podedes atopalas na nosa marabillosa biblioteca!

Xa para rematar, deixámosvos por aquí unha peza musical: o poema Alborada interpretado por Uxía. Desta vez a elección foi difícil porque hai moitos poemas de Rosalía musicalizados, como o tributo que o Concello da Estrada lle fai ano tras ano a Rosalía e que podedes escoitar na súa canle. Mais a Alborada ten unha beleza especial, algo de optimismo que casa moi ben co mes da Candeloria, por iso finalmente nos decantamos por ela. Esperamos que a desfrutedes tanto coma nós! Feliz día da nosa Rosalía!